من خبرتي القليلة من الناس الي تعاملت معاهم وكانت ابراجهم دي.. إليكم الخلاصة..
الحمل.. متدخلش معاه مناقشة أرجوك
هيحاول يحطم نظريتك بين سخرية ودلائل وصوته العالي دليل فعلا علي ضعف موقفه.
فيهم إنسانية تشمل العالم كله ولكن الي حواليه لا..
اكتر تاني برج أناني من بين الأبراج.
الثور.. مساعد جدا جدا لغيره
إحساس بالآخرين والتعاطف عالي ..محبين للحياة جدا بيستمتعوا بأصغر حاجة. عيبين خطيرين لمستهم فيهم.. لحظة إنفجار غير متوقعة قد تكون بعد الخناقة بأسبوع اصلا.. والشي الثاني بيهتموا بنظرة مادية للحياة شوية.. وصعب يغلط نفسه.. صعب تخدعه اوي دماغه شغالة طول الوقت.
برج الجوزاء.. متفاعلتش ابدا مع شخص جوزائي
في حتة سطحية علي غرور علي انقلاب متكرر.. حقيقي شخص غير متوقع.. في الجنسين.. وهو رقم واحد في اي حاجة يعوزها.. وبيشوف انه رقم واحد في الحياة بردو مع انه في الاغلب لا.
السرطان.. عرفت منهم الإناث فقط
الحقيقة طيبين جدا جدا دمهم خفيف والاثنين أمهات كويسين جدا، و مصطلح ست جدعة ينطبق عليهم.. وفيهم حتة سيكوباتيه شوية بس في المجمل لذيذة.
الأسد.. ربنا يجعل كلامنا خفيف عليهم
البنات الحقيقة مغرورين شويتين ودة بيقفلني حتي لو الشخصية حلوة وعجباني جدا..الرجل.. مغرور شويتين ودة بيقفلني حتي لو الشخصية حلوة وعجبتني بردو.. بس الجدير بالذكر هنا أن من اكتر الناس الي إنسانيته عاليه وبيتعاطف مع الآخر بسرعه ومساعد جدا .. تحس قلوبهم طفولية لسه.. بس دة يعني لو حظك حلو و بينلك ذاته الرايقة دي.. بس هو برج ظاهر سهل تعرفه باين بيلمع كدة بين الناس، وفيه غموض متعمد.
العذراء.. برج للانثي جميل
مساعد خدوم متواضع.. فيهم لمسه توحد الذات كدة .. بحسهم بيحبوا بعمق شديد.. وشايلين هم طول الوقت..
الرجل العذراء.. بلاش منه أحسن.
الميزان .. وصل وصل وصل ? الراعي الرسمي للتردد والقلق
محب للحياة لا يحكم علي الآخرين بسرعه ابدا.. الحقيقة معرفش ليه رجل الميزان منفر بالنسبالي يمكن اني بميل الرجل الي عنده استقرار وثبات اكتر.. بس المرأه فيهم محبة للجمال وبتشوفه في حاجات مستحيل تعرف تشوفها زيها.. حياتك معاها يعني شموع و ورد وأغاني كلاسيك.. وعندهم ولاء حقيقي لو حبو بجد. يا بخت الي في حياته ميزان من الآخر يعني ليه معرفش..
العقرب.. قومي بينا نمشي..
اكتر برج محير الحقيقة.. ما بين بنات وولاد.. مش فاهمة في ايه .. أيوة يعني انت كويس ولا مجنون ولا البعد عنهم غنيمة معرفش .. من الآخر العقرب حقيقي شبه البطيخة يا تطلع حلوة يا تطلع قرعة..
تشوفهم مساعدين للغير كدة نقول يا سلام صاحب صاحبة.. تسمع طوله لسانه وانتقاده تقول يا ساتر..
محبين جدا عاشقين جيدين إنما يا اخي عندهم نزعة خيانة بردك تبقاش فاهم..
أركب معاه الرولوكستر.. لانه بجد هيبسطك ويخليك تشوف الدنيا من فوق شوية ويشقلب كل الهدوء دة فجأه..
ربنا يكون في عون الي في حياته عقارب كتير …
القوس..
غير مؤذين ابدا متخافش لوفي حد قوس في حياتك.. طيبين وبيحبوا الحياة النضيفة المرفهة.
تحس ان القوس إعتذار لباقي الأبراج النارية.
الجدي.. ميسم يا سلام ..
بيحبوا الناس كدة من غير سبب وبيساعدوا بشكل كبير احتمال يحطك في أولوياته مع ان حضرتك متستاهلش.. بس هو كدة بيعطيك أكتر ما بياخد منك جدا.. غير عادلين ابدا.. ليهم لمحة متشائمة وحزينة لكل شي وكأنهم قاعدين بيتفرجوا علي نهاية العالم بين الأنقاض.
المخيف فيهم قلبتهم الي ملهاش رجعه دي.. بس للأمانة دايما بيكون ليهم فيها حق.. وبعد ما بيكونوا حاولوا أنهم يصلحوا الوضع كتير..
الدلو.. معرفتش حد من قريب منهم ..
بس واضح ان هما ولود حلال يعني.. وغير مؤذيين من برة كدة.. بس في لسعه خفيفة عندهم تحسسك أنهم مش معانا على الكوكب.. ودة احسنلهم الحقيقة..
الحوت ?
الحوت يعني الحنية.. والقلب الأبيض.. الحوت برج العاشق كما قال الكتاب.. وشوية غرور بسيطة كدة على تواضع متعرفش ايه التركيبة الجميلة دي. سميها اعتزاز بالنفس. وفيهم نوع قلاب كدة مرعب .. و من غير ما يصلح حاجة ببساطة لو تعب بيمشي بهدوء..
سهل تكسب معاه نقاش .. مش لأنك سهل تقنعه بس ببساطة هو مش مستني يكسبك.. هو عارف انه صح فهيسيبك تهري براحتك.. مش هيحاول يقلل من قيمتك.. برج خدوم جدا يديك عينيه لو حبك ودخلك اختبارات كتير لحد ما يثق فيك..وفي الأغلب بيفضل عنده نزعه شك بتحميه.
ومش هقولكم علي مين اول برج أناني بينهم.
جميل جدا شكرا لأنك وصلت لآخر المقال المفيد الرهيب دة.. تخيل إن الكلام دة يبقى له دور أساسي في تقييمك لشخص.. ممكن تقرب من حد أو تبعد بناءا علي هري حرفيا..
شخص شفته غامض ومغرور شويتين فتقول اه طبعا دة برجه كذا.. لا ياريت نسمي الأشياء بأسمائها الحقيقة مش الحركية .. العيب الي لمسته في شخص دي طبيعته.. مش صدفة يوم ولادته..
التفاخر إلي في عيب برجك أرجوك متنزلوش كنوع من التهديد لينا في بوست..
الإنسان صعب يتنصف حلو وحش، دلو ميزان.. ناري هوائي…
كلنا مزيج من شوية عصبية علي شوية حنية علي محبة علي جبن.. كلنا كدة.
الغريب أن فعلا في ناس تبتدي تقلق لما اقولهم انا برجي كذا.. وكأن عيوب برجي الي معرفش مين في الدنيا الي عرف يكتشفها بسلامته.. ممكن تنقص مني درجة في نظرهم حتي لو علي سبيل الهزار..
في شعوب تجاوزت الهري دة من زمان ولكن احنا لسه بندور علي جوجل عن صفات برج معين عشان متقدم لواحدة..?
موضوع كان واقف في زوري الحقيقة… شكرا.
سالي بازي
