الراجل مش متعود أنه يظهر مشاعره، بيتربى أنه دة عيب ويقلل من ذكورته، ذكورته دي الي بتبدي مثلا وهو عنده خمس سنين، كل الي حواليه يعنفه لو عيط لما يقع، أو لما حد يضربه من صحابه وميردش الضربة، يكبر ويكبر وتفضل ذكورته متعلقه بإظهار المشاعر، سواء حب فيتقال عنه عاطفي وتبتدي التريقة.. حتي من البنت بالمناسبة الي بيحبها، عشان هي كمان فاهمة أن الراجل الحنين بيكون نحنوح.
ومشاعر الحزن على شخص فقده لازم برده ميظهرش دة حتى لو واقف بعد الشر في عزا أبوه.. أجمد كدة وشد حيلك ومتعيطش..
في الوقت الي المرأه بتاخد كل الطبطبة والمواساة. يفضل يا عيني طول عمره موصوم بأي مشاعر يظهرها ما عدا شعور واحد.. الغضب.. دي الحاجة الوحيدة الي المجتمع يسببه يطلعها، لأ وبيمدحوه كمان ، دمه حامي غيور، حمش، من ضهر راجل… إلخ.
بيربولنا وحش صغير مستني يكبر ويطلع كل غضبه علي حبيبته مراته أولاده أخته.. ونفضل احنا نعاني معاه من التشوه النفسي دة..
زمان سئل الفيلسوف سؤال منطقي.. what women want وقليل ما لقينا حد يسأل سؤال منطقي زيه.. what men want.
أعتقد والله اعلم من شوية دراسات ان مطالبه واضحة وبسيطة، نفسيته أقل تعقيدا من الكم الي عندنا. ملخص الدراسات دي بعد ما سألو رجاله كتير.. ببساطه عايز صديقة بتسمع وتقترح وتتناقش ويقضي وقت ممتع معاها، عايز أم، لأن أمهات كتير ربتهم من غير ما تظهر مشاعر واهتمام حقيقي، عشان بردو يطلع راجل،
ما علينا.. الأم البديلة دي بقي الي حضرتك هتقومي بدورها بس ع كبر، شوية اهتمام ع أكله حلوة ، سؤال عنه، حتى دعوة منك. الصفات الحلوة الي في الأم، اكيد مش أنك تقوميه ولا تربي، بس ببساطة تكوني المكان الي بيجري يستخبى فيه لما تضيق بيه الدنيا.. وطبعا الرد البديهي عايز امرأه جميلة… بس دي نتكلم عنها بعدين..
عايز يعيش في حالة حب زي البنت بظبط، بس تعبيره بيكون مختلف عن التريند الي البنت بتصنفه على أنه رومانسية، وارد وهو ماشي بدبدوب بميتين جنية وبوكية ورد أحمر يبقي مكسوف حقيقي، وخايف لحد من صحابه يشوفه..
صحابه دول الي منهم لو سمعوا مامته بتدلعوا يتريقوا عليه.
لقوا ان اغلب الرجالة شايفين الرومانسية أنه يلعب بلاي ستيشن معاها، يهزر براحته من غير حساسية، يأكل أكله حلوة قدام التلفزيون وهما حاضنين بعض.
البساطة دي في التعبير عن الحب بتخوفه إنه يطلبها، في الوقت الي البنت بتستنى إهتمام من نوع آخر الي هو مبيطلبش دة.. بتخلي في فجوة بينهم. بالمناسبة لقو إن رجالة كتير بتخاف أنها تروح تتكلم مع البنت الي بيحبها، فكرة إنه يتعرض للرفض هو هو نفس الخوف الي عندها..
الراجل مش شجاع وجرئ اوي بالعادة زي ما فهمونا.. بيحسب الموضوع جدا لدرجة تخوفه وتصل لدرجة إنه يتجاهلها تماما كنوع من الحماية لنفسه.. زي ما انتي بتسمع قصص صحابك الي ارتبطوا وتخافي من الجواز زيهم، هو كمان سمع من صحابه عن بنات تعبو معاهم جدا والي سابته والي خانته وهكذا..
كلنا بشر عادي، بس بشكل أو بآخر لان المرأة أضعف فيبان أنها المظلومة الوحيدة في العلاقة، ودة سببه ان الراجل الي معاها مش بيروح يعيط لصاحبه ويكسب تعاطفهم.. يعني من بين كام راجل تعرفيهم، مش هتشوفي بسهولة وجعه من حبيبته، زي ما تسمعي من صحباتك عن نفس الوجع.. دة مش دفاع عن حد بس شوية دراسات كدة اتعملت عن قوة الراجل الخارجية دي..
مش قصدي هنا تماما، الراجل المتطرف، لا هو إرهابي ولا السفاح ولا الي بيضرب مراته او يخونها او يسيب ولاده، فاهمه ان في نوعيه من الراجل صعبه جدا ومؤسفة.. ولو إن دول بردو ليهم تركيبة نفسية مثيرة أنها تدرس..
انا بتكلم عن البني آدم الإنسان الطبيعي الي بنشوفه في الشغل في الكلية صديق ابن خالة..
خلوهم يخرجوا مشاعرهم لأن الكبت دة يظهر عليهم في صورة عنف، مرض، اكتئاب، عصبية، وأرق وإحنا الي بنشرب في الاخر?
يمكن نفهم بعض أكتر، كلنا فينا ضعف ومش مطلوب تغير الأدوار..
ولا يسعني هنا إلا أن أذكر قول ماجد الكدواني..
قلب الراجل زي الجوز هند ناشف من برة لكن لو وقع يسيل، وقلب الست زي المانجا، من برة طرية ومن جوا صلبة.
سالي بازي
