عزيزي مؤذن مالطا… حابة اسألك سؤال واستفاد من خبرتك الي هي واضح أنها غير ناجحة.. والدليل ان المثل دة عندنا بقي بيضرب بيه الشخص ال hopeless الي بيعمل حاجة غير مجدية…
طيب بما ان انت الشخص الوحيد في مالطا، وبشكل او بآخر انت مختلف عنهم ولوحدك يا حرام في الإختلاف دة..
ليه قررت تأذن فيهم، والأذان هنا مش القصد الديني ولكن مناداتك بحاجة جديدة غريبة عن كل الي حواليك..
هل الحكومة في مالطا مثلا اعتبرتك أقلية فبالتالي انك تأذن في مالطا كنوع من طلب حقوقك، زي مسيرات حقوق المثلية مثلا في امريكا والدول المتقدمة، أو المسيرات الي بطالب بحقوق اللاجئين..
جميل.. ليه بما انك مختلف مدخلتش بيتك ومارست فيه الي انت عايزة من دون ما تخرج على ناس كلهم مختلفين عنك وتحاول تظهر ليهم توجهك الجديد الفريد الخاص بيك… ممكن افهم كتير من الفلاسفة مثلا أنهم كانوا بيعملوا كدة فهل دي كانت نيتك الطيبة فعلا؟.. ولا كنت قاصد تبقي زعيم لفئة فأنت بتحاول تضم ليك أتباع واعوان يعجبوا بأذانك وفكرتك الجديدة وبعدين تبقي انت وأتباعك بتأذنوا في مالطا..؟
ولا كان عندك نظرة وجودية بإثبات نفسك وخلاص الي هو هييييه أنا موجود خدوا بالكم يا جماعة، يعني متأخذنيش في ناس حوالينا كتير بيبقوا هيموتوا ويدلو بدلوهم حتي لو محدش سمعهم وأحيانا حتي لو الي بيقولوا دة كلام فارغ .. بس أهو بياكلوا عيش..
إحساسك باليأس ازاي فضل على وضعه وكل سكان مالطا حواليك قرروا يثبتوا علي وضعهم بردو وميسمعوش آذانك..
ما هو يا أما انت شخص زكي وصاحب مبدأ ومطلب معين يا أما انت شخص بتحاول تعمل مشاكل مع الي حواليك وخلاص عشان يقولوا الواد المختلف مؤذن مالطا اهو!
ياريت ترد علي أسئلتي دي في اقرب فرصة، لأن المجتمع كله مش فاهم أي حد بيقرر يأذن في مالطا زيك سواء مفهمش.. فقدرك او شتمك… وتصدق بقى أحيانا لما بتموت بس.. بيبتدوا يمدحوك ويفتكروا أعمالك وآذانك مع إنك كنت عايش بينهم بتأذن من سنين..
ومستغربش لو لقيت تمثال ليك كمان في وسط ميدان…
تقبل مني فائق التقدير والاحترام…
سالي بازي
